Ինչպես հաղորդում է Մեդիամաքս-ը, այս մասին թեկնածուն ասել է փետրվարի 22-ին` «Կենտրոն» հեռուստաընկերության «Ուրվագիծ» հաղորդման ընթացքում:
«Ես շարունակելու եմ աշխատել ժողովրդի հետ, սա ընդհանուր պայքար է, եւ այն կարող է երկարատեւ լինել: Պայքարի քաղաքացիական եւ քաղաքական օրակարգը ձեւավորելու է ժողովուրդը: Չի լինելու նախկինի պես, մենք պայքարելու ենք բոլոր ամբիոններում, այդ թվում՝ Ազգային ժողովում»,- ասել է Րաֆֆի Հովհաննիսյանը հավելելով, որ պատրաստ է պայքարը շարունակել անգամ ամիսներով:
Թեկնածուն նշել է, որ «ժողովրդին չի տանելու դեպի արյուն»:
Րաֆֆի Հովհաննիսյանը բացառել է «կեղծված ընտրությունների հետքերով» իշխանության հետ որեւէ փոխզիջման գնալու հնարավորությունը:
Մեկնաբանելով Շիրակի մարզպետի հրաժարականը՝ թեկնածուն ասել է.
«Ընտրություններին իշխանության համար համապատասխան ցուցանիշ չապահովելը հրաժարականի համար վատագույն դրդապատճառ է»:
